Indefiniittupronominat (Ebämiärypronominat)
Indefiniittupronominat viitatah moizih ezinehih, kudamih näh ei ole
tarkua tieduo. Struktuuran puoles indefiniittupronominat jagavutah kolmeh joukkoh:
-
indefiniittupronominat, kudamat roitah interrogatiivupronominois
-gi, -tah, -tahto, -lienne suffiksoin avul:
kengi, kentah, tentahto, kenlienne, ketgi, kettah, kettahto,
ketlienne, migi, mitah, mitahto, milienne, mitgi, mittah, mittahto,
mitlienne, kudaigi, kudaitah, kudaitahto, kudailienne, kudamatgi,
kudamattah, kudamattahto, kudamatlienne, mittuinegi, mittuinetah,
mittuinetahto, mittuinelienne, mittumatgi,
mittumattah, mittumattahto, mittumatlienne.
-
indefiniittupronominat, kudamat roitah kuda-prefiksal interrogatiivupronominois:
kudaken, kudaket, kudamidä.
-
indefiniittupronominat eräs, erähät.
Kenentah talois toinah vie ei muata. Muamo joute ei voi olla, mintah
ruavon ainos löydäy. Häi keksii mittumanlienne uvven vehkehen. Minä
duumaičen, kaikin ei voi tulla, ga kudaken tulou. Hyö kudamidä
opitah kohendella. Erähät on jo mendy iäre.
Indefiniittupronominoin taivutus
Pronominat ketgi, kettah, kettahto, ketlienne; mitgi, mittah, mittahto, mitlienne, kudamidä
ei taivuta.
Toizet indefiniittupronominat, kudamat on roittu
interrogatiivupronominois, taivutah yhtenjytyi niilöinke.
Liittehet da liitehsanat ei taivuta.
Pronominoi kentah, mitah, kudaitah, mittuinetah, kudamattah, mittumattah
ei käytetä abessiivas.
Pronominal eräs vardalot ollah: eräs (erähä-, eräs-) da monikos erähät (erähi-).
Taivutammo indefiniittupronominat kengi, kudatah, eräs:
Nominatiivu | kengi | kudaitah | eräs | erähät |
Genetiivu | kenengi | kudamantah | erähän | erähien |
Partitiivu | kedägi | kudamuatah | erästy | erähii |
Essiivu | kenennygi | kudamannutah | erähänny | erähinny |
Translatiivu | keneksegi | kudamaksetah | erähäkse | erähikse |
Inessiivu | kenesgi | kudamastah | erähäs | erähis |
Elatiivu | kenespäigi | kudamaspäitah | erähäspäi | erähispäi |
Illatiivu | kenehgi | kudamahtah | erähäh | erähih |
Adessiivu | kenelgi | kudamaltah | erähäl | erähil |
Ablatiivu | kenelpäigi | kudamalpäitah | erähälpäi | erähilpäi |
Allatiivu | kenelegi | kudamaletah | erähäle | erähile |
Abessiivu | kenettähgi | - | erähättäh | erähittäh |
Komitatiivu | kenenkegi | kudamanketah | erähänke | erähienke |