Attribuuttu
Attribuuttu on virkehen ližäozapuoli, kudai ozuttau ezinehen
tunnustu libo luaduu da vastuau kyzymyksih mittuine? mittumat?
kenen? min?
Attribuuttua enimyölleh käytetäh miärättävän substantiivan ies.
No attribuuttua voi käyttiä miärättävän substantiivan jällesgi.
Attribuutannu voi olla:
-
adjektiivu:
Mustat korbivaroit kl'onketetah.
Katiškah puutui suuri haugi.
Adjektiivuattribuuttu enimyölleh on samas sijas da luvus piäsananke.
Vaiku attribuutannu käytetyt sanat aiga, enzi, eri, joga, kogo ei
taivuta:
Uuzi škola seizou aiga korgiel mäil.
Enzi kezänny ruvetah kohendamah sildua.
Myö ruavoimmo eri vaigiedu ruaduo.
Joga ristikanzu oman ozan iče rakendau.
Kogo opastuijoukko oli jo luokas.
-
substantiivu. Substantiivuattribuuttu enimyölleh on genetiivas,
no substantiivuattribuuttu voi olla toizisgi oblikvusijois:
-
genetiivas:
Huavan lehti pakkuu jalgoih.
Buaban suarnat kaikkii miellytetäh.
Minun tuatto on rodinuhes Kinnermäin kyläs.
-
inessiivas: Ilo silmis pal'l'asti tytön rakkahuon.
Kaššali selläs painoi kai olgupiät.
-
Elatiivas: Buabo saneli suarnoi meččyelättilöis.
-
Illatiivas: Muaman rakkahus lapsih äijäl auttau heidy.
Matku kyläh oli lyhyt. Avua uksi gorniččah.
-
Adessiivas: Huavat järven rannikol on ruvettu jo kellistymäh.
Halgopinot pihal tuatto varusti talvekse.
-
Abessiivas: Tyttö palmikottah on kui vaza hännättäh.
-
Komitatiivas: Naine lapsenke ei ehtinyh avtobussah.
-
Substantiivuattribuutannu voi olla virgunimi libo arvonimi:
Pidäy sanuo täs šeikas johtai Petrovale.
Tämä keksindö kuuluu professor Ivanovale.
Substantiivuattribuuttu täs on taibumatoi.
-
Pronominu oblikvusijois:
Niilöi vuozii myö mustelemmo ainos.
Heijän kodi on meijän koin vieres.
Sille opastujale palkivokse on annettu kniigu.
Kenen leibiä syöt, sen i pajuo pajatat.
-
numerualu:
Minä elän seiččemendel kerroksel.
Älä vuota tostu kerdua.
Jo nävytäh enzimäzet kullat koivus.
Tulet palettih vaiku kolmandes talois.
-
partisiippu (adjektiivan merkičykses):
Pajattai tyttö hyvin maltau karjalakse.
Saneluu kirjuttajat opastujat ollah kaheksasluokkalazet.
Kalarokku on magei vilustunnuhgi.
Sualistunnuot vil'l'at vihmu pani lagoh.
Lugiettavu kniigu oli jätetty avvoi.
Tuatto hyvin tiedäy syödävät sienet.
Buabo čuajunke suvaiččou havvottuu maiduo.
Rannale jätettylöi kaloi n'okittih kajoit.
-
sanayhtymy:
Vastavui lambuon randamil starikku orožu selläs.
Tyttö tukat levälleh juoksendelou pihua myöte.