Passiivan I partisiippu

Passiivan I partisiipan tunnukset ollah -va, -vä, nominatiivas -vu, -vy. Tunnus liittyy -tta, -ttä, -ta, -tä, -da, -dä -loppuhizih vardaloloih:

-tta -vardalo:
kirjutetta-vu, kannetta-vu, ostetta-vu, annetta-vu, mustetta-vu, lugietta-vu, laskietta-vu, sanotta-vu, kačotta-vu, hierotta-vu, kučutta-vu, leikatta-vu, paikatta-vu, katkatta-vu, pajetta-vu, čometta-vu, lainotta-vu, tukutta-vu;
-ttä-vardalo:
keitettä-vy, peitettä-vy, hävitettä-vy, levitettä-vy, kiännettä-vy, kiitettä-vy, ečittä-vy, riičittä-vy, lähtiettä-vy, ehtittä-vy, viettä-vy, lykättä-vy, hypättä-vy, ähkättä-vy, vieteltä-vy, sellitettä-vy, čällättä-vy, hyllättä-vy;
-ta, -tä -vardalo:
juosta-vu, nosta-vu, purta-vu, nähtä-vy, piästä-vy, viertä-vy;
-da, -dä -vardalo:
juoda-vu, tuoda-vu, suada-vu, luoda-vu, myödä-vy, syödä-vy, juoda-vu.

Passiivan 1. partisiippu taibuu sijois da luvus. Taivutammo sanayhtymän ruattavu ruado:

	yksikkö	monikko
Nominatiivu	ruattavu ruado	ruattavat ruavot
Genetiivu	ruattavan ruavon	ruattavien ruadoloin
Akkuzatiivu	ruattavan ruavon	ruattavat ruavot
Partitiivu	ruattavua ruaduo	ruattavii ruadoloi
Essiivu	ruattavannu ruadonnu	ruattavinnu ruadoloinnu
Translatiivu	ruattavakse ruavokse	ruattavikse ruavoloikse
Inessiivu	ruattavas ruavos	ruattavis ruadolois
Elatiivu	ruattavas ruavospäi	ruattavis ruadoloispäi
Illatiivi	ruattavah ruadoh	ruattavih ruadoloih
Adessiivu	ruattaval ruavol	ruattavil ruadoloil
Ablatiivu	ruattaval ruavolpäi	ruattavil ruadoloilpäi
Allatiivu	ruattaval ruavole	ruattavile ruadoloile
Abessiivu	ruattavattah ruavottah	ruattavittah ruadoloittah
Komitatiivu	ruattavan ruavonke	ruattavien ruadoloinke
Prolatiivu	ruattavači ruavoči	ruattaviči ruadoloiči
Instruktiivu		ruattavin ruadoloin

Passiivan I partisiippu ilmoittau ruandua libo tapahtumua, kudai pidäy ruadua libo kudai on tevonalaine:

Lugiettavu kniigu oli jiännyh stolale avvoi.
Kynnettävy peldo vie ei ole sulanuh jiäs.
Kai ruattavat ruavot pidäy ruadua aijoilleh.
Kuivattavat kalat pidäy vähäzel suolata.
Kytkiettävy peldo ei olluh ylen suuri.
Kai myödävät tavarat oldih kallehet.
Kohendettavat sovat pidäy enzimäi pestä.
Uvvistettavu pal'to oli mustu.
Hienombat kartohkat jätämmö muah pandavakse, karjembat syödäväkse.
Stolale avvoi jiännyh kniigu on lugiettavannu.
Sulamatoi jiäs peldo on kiännettävy myöhembäh.
Kai ruavot ollah aijolleh ruattavat.
Vähäzel suolatut kalat ollah kuivattavakse.
Ei ylen suuri peldo on kytkettävänny.
Kai kallehet tavarat oldih myödävänny.
Pestyt sovat ollah kohendattavakse.
Mustu pal'to on uvvistettavu pruazniekas.
Hienombat kartohkat ollah pandavakse muah, a karjembat ollah syödäväkse.