Yksipersounahizet verbit

• erilazii luonnos tapahtujii šeikkoi. Niidy verbilöi vie sanotah meteorologizikse verbilöikse: hämärdyy, pimenöy, valgenou, vihmuu, tuuččuau, tuulou, kajostah, pakastah i m.i.
  Jo hämärdäy, pidäy kiirehtiä kodih.
  Sygyzyl aijoi pimenöy.
  Vuota, konzu valgenou, sit lähtet.
  Meččäh emmo lähte, ku vihmuu.
  Pihal ylen äijäl tuuččuau.
  Viego tuulou?
  Minä duumaičen, huondeksel kajostah.
  Radivos sanottih, huomei pakastah.
• ristikanzan erilazii tundoloi: juotattau, oksenduttau, nikoittau, väzyttäy, ryvittäy, kivistäy, haikostuttau, nukuttau, kupettau, varaittau, itketyttäy, ilaškoittau i m.i.
  Kalan syödyy juotattau.
  Lapsi on voimatoi, händy oksenduttau.
  Ken maininnou minuu, nikoittau.
  Täs ruavos äijäl väzyttäy.
  Kylmähyy ryvittäy.
  Piädy kivistäy puaksuh.
  Haikostuttau, pidäy viertä muate.
  Mene muate, ku nukuttau.
  Hiestyhyy hibjan kupettau.
  Yksin varaittau lähtie.
  Nengomas elokses itketyttäy dai ilaškoittau.
• Eri joukkoh kuulutah verbit, kudamii sanotah varzinazikse yksipersounahizikse verbilöikse. Niilöin joukkoh kuulutah verbit pidäy, pädöy, kannattau, tarviččou, himoittau i m.i.
  Pidäy kaččuo, kui roih parembi.
  Pädöy eliä kyläs.
  Kannattau ostua tämä kodi.
  Tarviččou ajatella enne kui ottuakseh toimeh.
  Himoittau kävvä sinne.
  Mainittuloi verbilöi, tiettäväine, suau käyttiä monipersounahizinnugi. Sit niilöil on jo oma merkičys: Muamo pidäy lastu yskäs. Tämä kniigu pädöy lugiettavakse lapsile. Hyö kannatetah omua ystäviä. Minä en tarviče nimidä. Himo himoittau, vačču kurkettau.