Persounu da lugu

Verbilöil on kolme persounua yksikös da monikos. Joga persounal yksikös dai monikos on oma persounupiäteh. Persounupiättehet ollah:

yksikön 1. persounu	-n
yksikön 2. persounu	-t
yksikön 3. persounu	-u, -y
monikon 1. persounu	-mmo, -mmö
monikon 2. persounu	-tto, -ttö
monikon 3. persounu	-h

Yksivardalohizis verbilöis persounupiättehet liitytäh nenga:

Yksikön da monikon 1:zes da 2:zes persounas persounupiäteh liittyy heikkoh vokalivardaloh:
keittiä (keitä-, keittä-): keitä-n, keitä-t, keitä-mmö, keitä-ttö.
Yksikön 3:ndes persounas persounupiäteh liittyy lujah vokalivardaloh:
oppie (opi-, oppi-): oppi-u.
Monikon 3:ndes persounas vardalo on -ta, -tä, -ja, -jä, -va, -vä- loppuhine, sih i liittyy persounupiäteh:
heitetäh, opita-h, suoja-h, jiäjä-h, tuvva-h, syvvä-h.

Taivutammo verbit ruadua (rua-, ruada-), eččie (eči-, ečči-), löydiä (lövvä-, löydä-), tuvva (tuo-).

y.1	rua-n	eči-n	lövvä-n	tuo-n
y.2	rua-t	eči-t	lövvä-t	tuo-t
y.3	ruuda-u	ečči-y	löydä-y	tuo-u
m.l	rua-mmo	eči-mmö	lövvä-mmö	tuo-mmo
m.2	rua-tto	eči-ttö	lövvä-ttö	tuo-tto
m.3	ruata-h	eči-täh	lövve-täh	tuvva-h

Kaksivardalohizis verbilöis kaikis yksikön da monikon persounis persounupiättehet liitytäh vokalivardaloh:
čakata (čakkua-, čakat-): čakkua-n, čakkua-t, čakkua-u, čakkua-mmo, čakkua-tto, čakata-h,
kačella (kaččele-, kačel-): kaččele-n, kaččele-t, kaččlo-u, kaččele-mmo, kaččele-tto, kačella-h,
Monikon 3:ndes persounas vardalo on -ta, -tä, -la, -lä, -na, -nä -loppuhine, sih i liittyy persounupiäteh: čakata-h, kačella-h.

Taivutammo verbit vastata (vastua-, vastat-), läikätä (läikkiä-, läikät-), tulla (tule-, tul-), mennä (mene-, men-):

y.1	vastua-n	läikkiä-n	tule-n	mene-n
y.2	vastua-t	läikkiä-t	tule-t	mene-t
y.3	vastua-u	läikkiä-y	tulo-u	menö-y
m.1	vastua-mmo	läikkiä-mmö	tule-mmo	menemmö
m.2	vastua-tto	läikkiä-ttö	tule-tto	mene-ttö
m.3	vastata-h	läikätä-h	tulla-h	mennä-h