Subjektan da predikuatan mugavundu
Karjalan kieles on moine siändö: ku subjektu virkehes on yksikös,
sit i predikuattu on yksikös.
A ku subjektu ollou monikos, sit i predikuattua käytetäh monikos:
Opastui sanou runuo. Opastujat sanotah runuo.
Predikuattu paiči luguu mugavuu subjektan persounasgi:
Minä syön murginua. Sinä syöt murginua.
Predikuatan mugavundua subjektan persounah da luguh grammaatiekas
sanotah kongruensiekse.
Täs siännös on poikkevustu.
-
Ku subjektannu ollou sanayhtymy, kudamah kuuluu perusnumerualu,
sit predikuattu on yksikön 3:ndes persounas:
Luokas oli viizi opastujua.
Koin vieres kazvau seiččie koivuu.
Pertis istui kymmene hengie.
Kerähmöh tuli enämbi sadua hengie.
-
Ku subjektannu ollou partitiivumuodo, sit predikuattua käytetäh
yksikön 3:ndes persounas:
Tuatal täyzi piä on harmuadu tukkua.
Moni regie halguo happanou tagaveriäl.
-
Ku subjektannu ollou kollektiivunominu, sit verbii käytetäh monikos:
Rahvas mennäh ruadoh.
Enimistö tuldih järilleh.
Sit perehes kogo poiguveh ollah voimattomat.
Tädä šeikkua sanotah inkongruensiekse.