Verbilöin juondamine

Karjalan kieles verbit roijah suffiksoin avul. Niidy juondetah nominois da verbilöis.

Faktitiivizet verbit

Faktitiivizet verbit ozutetah sen ruandua libo mostu teguo, midä merkiččöy kandusana - substantiivo libo adjektiivu. Faktitiivizet verbit roijah nengomien juondehien (suffiksoin) avul:

-da, -dä: pizar -> pizardua, höyhen -> höyhendiä;
-ta, -tä: varras -> varrastua, veres -> verestiä;
-nda, -ndä: suuri -> suurendua, viäry -> viäristiä
-tta, -ttä: rousku -> rouskuttua, pehmei -> pehmittiä
-itta, -ittä: rauhu -> rauhoittua, pyhä -> pyhittiä
-i: kukku -> kukkie, kengy -> kengie;
-ti: kareh -> karehtie, märeh -> märehtie.

Translatiivizet verbit

Translatiivizet verbit ozutetah muutundua sikse libo moizekse, midä merkiččöy kandusana - substantiivu libo adjektiivu. Translatiivizet verbit roijah nengomien suffiksoin avul:

-ne: vahnu -> vahnata, pieni -> pienetä;
-ksi: suuri -> suureksie, pieni -> pieneksie;
-du, -dy: suolu -> suolduo, hämäri -> hämärdyö;
-tu, -ty: homeh -> homehtuo, köyhy -> köyhtyy;
-stu, -sty: laho -> lahostuo, pöly -> pölystyö;
-vu, -vy: ravei -> ravevuo, meččy -> meččävyö.

Momentatiivizet verbit

Momentatiivizet verbit ozutetah lyhytaigastu libo kerrallistu ruandua. Net roijah nengomien suffiksoin avul:

-hta, -htä: kaččuo -> kačahtua, kävvä -> kävähtiä
-lda, -ldä: kandua -> kannaldua, piästiä -> piästäldiä

Frekventatiivizet verbit

Frekventatiivizet verbit ozutetah monikerrallistu ruandua. Net roijah nengomien suffiksoin avul.

-le: kastua -> kastella, hävittiä -> hävitellä;
-ndele: kuulta -> kuundella;
-ttele: laskie -> lasketella, eččie -> ečitellä;
-ksendele: tuvva -> tuoksendella

Kontinuatiivizet verbit

Kontinuatiivizet verbit ozutetah pitkäh tapahtujua ruandua Net roijah nengomien suffiksoin avul:

-i: čongata -> čongie, lykätä -> lykkie;
-ksi: kulgie -> kulleksie, sylgie -> sylleksie;
-o: vadvata -> vadvuo, leikata -> leikkuo.

Kauzatiivizet verbit

Kauzatiivizet verbit ozutetah pakoitettuu ruandua libo mostu ruandua, kudai on lähäine kandusanan merkičykseh. Suffiksat ollah nengomat:

-tta, -ttä: seizuo -> seizattua, niittiä -> niitättiä;
-hutta, -hyttä: jumsua -> jumsahuttua, pyörie -> pyörähyttiä.

Refleksiivu-translatiivizet

Refleksiivu-translatiivizet verbit ozutetah iččeh ruadajah kohtavujua ruandua. Suffiksat ollah nengomat:

-u, -y: pastua -> pastuo, löydiä -> löydyö;
-vu , -vy: hieruo -> hierovuo, eliä -> elävyö.

Erähät suffiksat juondetah verbilöi sego nominois, sego verbilöis. Moizien suffiksoin joukkoh kuulutah -i, -ksi, -tta, -ttä, -vu, -vy.