Pluskvamperfektu (Ammuinaigu)

Pluskvamperfektu merkiččöy teguo, kudai on tapahtunnuh ennepäi,ammui:
Sie oli pietty suurii jarmankoi. Buabo nuorennu puaksuh oli käynnyh teatrah. Silloi häi oli elännyh Moskovas. Brihat oldih mendy meččyruadoloih. Lapseh oldih tuldu kodih jo ammui.

Pluskvamperfektu roih abuverbis olla da piäverbis aktiivan libo passiivan (monikon kolmandes persounas) II partisiipas. Abuverbi olla taibuu imperfektas. Piäverbi on muuttumatoi.

Taivutammo pluskvamperfektas verbit ottua (ota-, otta-), myvvä (myö-), kabrastua (kabrasta-), panna (pane-, pan-):

y.1	olin ottanuh	myönnyh	kabrastannuh	pannuh
y.2	olit ottanuh	myönnyh	kabrastannuh	pannuh
y.3	oli ottanuh	myönnyh	kabrastannuh	pannuh
m.l	olimmo ottanuh	myönnyh	kabrastannuh	pannuh
m.2	olitto ottanuh	myönnyh	kabrastannuh	pannuh
m.3	oldih otettu	myödy	kabrastettu	pandu

Pluskvamperfektan kieldomuodo

Pluskvamperfektan kieldomuvvos taibuu kieldosana ei. Yksikön da monikon 3:ndes persounas käytetäh muoduo ei. Abuverbi olla on muvvos olluh, a monikon 3:ndes persounas - muvvos oldu. Piäverbi ei muutu.

Taivutammo iel mainitut verbit pluskvamperfektan kieldomuvvos:

y.1	en olluh ottanuh	myönnyh	kabrastannuh	pannuh
y.2	et olluh ottanuh	myönnyh	kabrastannuh	pannuh
y.3	ei olluh ottanuh	myönnyh	kabrastannuh	pannuh
m.l	emmo olluh ottanuh	myönnyh	kabrastannuh	pannuh
m.2	etto olluh ottanuh	myönnyh	kabrastannuh	pannuh
m.3	ei oldu otettu	myödy	kabrastettu	pandu

Pluskvamperfektua käytetäh, konzu ilmoitetah:

ammui tapahtunnuttu teguo libo šeikkua:
Silloi yhteh päiväh oli palettu kai taloit kyläs. Sennu vihmattomannu kezänny oli kuivettu kaivot. Histourii sanelou, kui rahvas oli elännyh ennevahnas.
mostu teguo libo šeikkua, kudai on tapahtunnuh enne paginas olijua imperfektal ilmoitettuu teguo:
Minä ostin mostu leibiä, mittumua tytär jo oli ostanuh. Kondii oli käynnyh kagrupeldoh, jället vie nävyttih, ku menin sih kohtah. Heinät jo oli kuivettu, konzu tulimmo niidy šingomah. Velli ajeli sih linnah, kus häi oli olluh armies. Kalaverkot jiädih vedeh, ku järven oli kylmännyh yhteh yöh. Tyttö opastuu sit samazes školas, kus oli opastunnuh hänen tuattah.